Apple App Store'da AI hamrohlar va tanishuv ilovalariga 18+ yosh chegarasini o'rnatdi

Apple kompaniyasi o'smirlar va voyaga yetmagan bolalar xavfsizligini kuchaytirish maqsadida App Store qoidalarini yangiladi. Dasturchilarga e'lon qilingan yangi talablarga muvofiq, romantik munosabatlar yoki shahvoniy mazmundagi suhbatlarni taklif qiluvchi barcha sun'iy intellekt hamrohlari hamda onlayn tanishuv ilovalari uchun 18+ yosh chegarasi majburiy qilib belgilandi.

Yangi qoidalar 16-noyabrdan boshlab to'liq amaliyotga kiritiladi. Endilikda dasturchilar o'z dasturlarida yangi kontent deskriptorlarini ko'rsatishi, ilovaning yosh reytingi uning amaldagi funksionaliga to'liq mos kelishini ta'minlashi shart bo'ladi. Ushbu choralar Apple kompaniyasining global miqyosda yoshni tekshirish texnologiyalari va ota-ona nazorati tizimlarini joriy etish strategiyasining mantiqiy davomidir.

Ushbu o'zgarishlar ayniqsa yoshlar o'rtasida katta shuhrat qozongan sun'iy intellekt xizmatlariga kuchli ta'sir ko'rsatadi. Masalan, Character.AI, Replika kabi servislarda virtual do'stlar, sevgililar va fantastik personajlar yaratish imkoniyati mavjud bo'lib, ular butun dunyo bo'ylab yuz millionlab marta yuklab olingan. Ilgari xAI kompaniyasi ham erkinroq xarakterdagi 3D AI hamrohlarni ishga tushirgan edi.

Bundan tashqari, Apple foydalanuvchilarning real vaqtdagi joylashuvini boshqalar bilan ulashadigan ilovalar ustidan ham nazoratni kuchaytirmoqda. Endi dasturlar bunday imkoniyat mavjudligini aniq ko'rsatishi shart, bu esa shaxsiy ma'lumotlar xavfsizligini ta'minlashga qaratilgan.