Apple Siri yordamchisini to‘liq avtonom AI agentga aylantirish ustida ishlamoqda

Apple kompaniyasi o‘zining Siri ovozli yordamchisini murakkab vazifalarni bajara oladigan va uchinchi tomon ilovalarini to‘liq boshqaradigan avtonom AI agentga aylantirishga intilmoqda. Bloomberg tahlilchisi Mark Gurmanning ma'lum qilishicha, kompaniya rahbariyati OpenAI’ning Dots hamda Meta’ning Muse kabi yangi avlod agentlari bilan raqobatlashish uchun Siri yo‘l xaritasini jadallashtirishni talab qilmoqda.

Yaqin oylarda Siri uchun ikkita muhim yaxshilanish taqdim etilishi kutilmoqda. Birinchisi, yordamchiga Apple’ning o‘z ilovalarini chuqur nazorat qilish imkonini beradi — masalan, u Photos ilovasida rasmlarni qirqish yoki Safari ilovasidagi vkladkalarni avtomatik tartibga solish kabi vazifalarni bajara oladi.

Ikkinchi va ancha kattaroq o‘zgarish — tashqi, uchinchi tomon ilovalari bilan integratsiya hisoblanadi. Ushbu yangilanish bahor faslida paydo bo‘lishi kutilayotgan bo‘lib, u Siri orqali Grubhub xizmatidan taom buyurtma qilish yoki OpenTable orqali kechki ovqat uchun joy band qilish kabi amallarni to‘liq avtomatlashtirishga yordam beradi.

Biroq Apple buning bilan to‘xtab qolmoqchi emas. Maqsad Siri’ni bir martalik buyruqlarni bajaruvchi vositadan maqsadni kuzatuvchi va oraliq qadamlarni mustaqil rejalashtiruvchi to‘laqonli agentga aylantirishdir. Foydalanuvchilarning talabi va bozordagi shiddatli raqobat tufayli bunday xususiyatlar keyingi yildan boshlab keng joriy etilishi mumkin.