Apple uchinchi tomon AI ilovalari orqali daromadni oshirish yo'llarini izlamoqda

Apple kompaniyasining xizmatlar ko'rsatish yo'nalishi rekord darajadagi daromad keltirayotgan bo'lsa-da, uning asosi hisoblangan App Store jiddiy bosim ostida qolmoqda. Qonunchilikdagi o'zgarishlar va mobil o'yinlar segmentidagi pasayish fonida, kompaniya moliyaviy o'sishni ta'minlash uchun sun'iy intellekt ekotizimiga e'tibor qaratmoqda.

Kompaniyaning moliyaviy direktori Kevan Parex navbatdagi moliyaviy hisobot taqdimotida AI kelajakda daromad o'sishiga qanday hissa qo'shishi haqida to'xtalib o'tdi. Uning so'zlariga ko'ra, sun'iy intellekt imkoniyatlari mijozlarni yangi qurilmalarni xarid qilishga undashdan tashqari, uchinchi tomon ilovalari va hamkorliklar orqali ham yangi moliyaviy imkoniyatlar yaratishi mumkin.

Parex aniq mexanizmlarni ochiqlamagan bo'lsa-da, investorlar Apple uchinchi tomon AI agentlarini App Store orqali tarqatish va ulardan tushadigan daromaddan komissiya olishi mumkinligini taxmin qilmoqda. So'nggi paytlarda Epic Games bilan bog'liq sud ishlari va AQSH, Braziliya hamda Yaponiyadagi yangi qoidalar tufayli kompaniyaning an'anaviy komissiya tushumlari sezilarli qisqargan edi.

Qiyinchiliklarga qaramay, uchinchi tomon ilovalaridagi pullik obunalar soni ikki xonali o'sish ko'rsatkichini qayd etmoqda. Apple o'zining xizmatlar sektorida kelgusi chorakda 8-9 foiz atrofida o'sish kutayotganini ma'lum qildi.