Emili Yoramo «Brayton»ga o‘tgani va WSLdagi maqsadlari haqida gapirdi

Iyun oyi oxirida «Brayton» klubi bilan erkin agent sifatida shartnoma imzolagan norvegiyalik yarimhimoyachi Emili Yoramo Angliya ayollar Superligasidagi (WSL) faoliyati borasida o‘z fikrlarini bildirdi. Klub anchadan buyon futbolchining o‘yinlarini kuzatib kelayotgan edi.

Yoramonig ta'kidlashicha, Skandinaviyadan Angliyaga ko‘chib o‘tish uning uzoq muddatli rejalaridan biri bo‘lgan, biroq u bu qadamni shoshilmasdan amalga oshirishni afzal ko‘rgan. Yarimhimoyachi yangi chempionatga jismoniy va ruhiy jihatdan to‘liq tayyor bo‘lganidagina kelishni istaganini ma'lum qildi.

«Ushbu ligaga ancha vaqtdan beri qiziqib kelardim va bir kun kelib bu yerda o‘ynash mening asosiy maqsadim edi. Muhimi — to‘g‘ri vaqt va yo‘lni topish edi. Juda erta ketishni istamadim, jismonan hamda ruhiy jihatdan tayyor bo‘lishni kutdim. Hozir esa barchasi o‘z o‘rnida ekanini his qilyapman», — dedi norvegiyalik futbolchi.