Gallup so'rovi: Sun'iy intellektdan har kuni foydalanuvchi amerikaliklar ham undan xavotirda

Gallup kompaniyasi Microsoft buyurtmasiga binoan dunyoning 37 ta mamlakatida o'tkazgan yangi so'rovnoma natijalarini e'lon qildi. Unda har bir mamlakatdan taxminan 1000 nafardan respondent qatnashgan bo'lib, tadqiqot odamlarning sun'iy intellektga bo'lgan amaliy qiziqishi va unga nisbatan qo'rquvlarini ochib berdi. Yakunda loyiha 140 ta davlatni qamrab olishi rejalashtirilgan.

Tadqiqot natijalariga ko'ra, AQSh sun'iy intellekt borasida eng ko'p xavotirda bo'lgan davlatlar qatorida yetakchilik qilmoqda. Amerikaliklarning 74 foizi AI bo'yicha umumiy xavotir bildirgan bo'lsa, texnologiyadan har kuni foydalanadiganlarning ham 68 foizi undan xavfsiramoqda. Shuningdek, AQSh aholisining faqatgina 36 foizi AI mamlakat rivojiga ijobiy ta'sir ko'rsatishiga ishonadi. Kanadada ham har kuni AI ishlatadiganlarning yarmidan ko'pi texnologiya oqibatlaridan havotirda ekanini aytgan.

Buning aksi o'laroq, Sharqiy Osiyo mamlakatlarida optimistik qarashlar ancha yuqori. Kunlik foydalanuvchilar ulushi bo'yicha yetakchi bo'lgan Singapurda (46 foiz) respondentlarning 80 foizdan ortig'i AI ularning kundalik hayotini yaxshilashiga ishonadi. Xitoyda ham sun'iy intellektdan har kuni foydalanuvchilar 35 foizni tashkil etib, ularning katta qismi texnologiyani davlat manfaatlari uchun foydali deb baholagan.

Shu bilan birga, optimizm har doim ham ma'lumotlar aniqligiga ishonchni anglatmaydi. So'rovda qatnashgan barcha ishtirokchilarning atigi 36 foizi AI taqdim etayotgan natijalarga to'liq ishonishini ma'lum qilgan. AQShda esa har kuni texnologiyadan foydalanuvchilarning atigi 45 foizi uning aniqligiga yuqori darajada ishonch bildirgan xolos.

Mutaxassislarning ta'kidlashicha, jamiyatda sun'iy intellektdan faol foydalanish qo'rquvlarni avtomatik ravishda bartaraf etmaydi. Foydalanuvchilar texnologiya imkoniyatlaridan unumli foydalangan holda ham, uning bandlik, axloq, kiberxavfsizlik va shaxsiy ma'lumotlar daxlsizligiga keltirib chiqarishi mumkin bo'lgan tahdidlaridan hushyor turishda davom etmoqda.