Google sun'iy yo'ldoshdagi AI serveridan ilk javobni qabul qildi

Google kompaniyasining maxsus AI chiplari bilan jihozlangan sinov sun'iy yo'ldoshi koinotdan Yerga o'zining ilk sun'iy intellekt javobini jo'natdi. Kompaniya e'lon qilgan rasmiy xabarga ko'ra, sun'iy yo'ldosh bortidagi Tensor Processing Unit (TPU) protsessorlari muvaffaqiyatli ishga tushirilgan va ularda Gemma 4 AI modeli faoliyat ko'rsatmoqda.

Birinchi amaliy sinov davomida koinotdagi Gemma 4 modeliga koinotda bo'lish hissi haqida xokku yozish so'rovi yuborildi va u buni muvaffaqiyatli bajardi. Shuningdek, mutaxassislar koinot mavzusidagi boshqa she'rlar va telemetriya so'rovlarini ham sinovdan o'tkazishdi. Ushbu tadqiqot joriy oyning boshida orbitaga chiqarilgan sun'iy yo'ldosh vositasida olib borilmoqda.

Mazkur sinov Google kompaniyasining koinotda to'liq AI ma'lumotlar markazlarini barpo etishni maqsad qilgan eksperimental Project Suncatcher tashabbusining bir qismidir. Koinot sharoitida hisoblash quvvatlarini sinash Yer yuzidagi energiya va sovutish cheklovlarini yengib o'tish yo'lidagi dastlabki qadamlardan biri hisoblanadi.

Kompaniya vakillarining ma'lum qilishicha, keyingi bosqichda TPU chiplarining orbitadagi termal bosim va nurlanish (radiatsiya) ta'siriga chidamliligi bo'yicha qator sinovlar davom ettiriladi. Mazkur sinovlar muvaffaqiyatli o'tsa, 2027-yilda bir-biri bilan bog'langan qo'shaloq sun'iy yo'ldoshlarni uchirish rejalashtirilgan.