Google va BMT sun'iy intellektga mos global statistika platformasini ishga tushirdi

Birlashgan Millatlar Tashkiloti tizimidagi agentliklar har yili sog'liqni saqlash, ta'lim va iqtisodiy o'sish kabi muhim sohalar bo'yicha yuqori aniqlikdagi statistik ma'lumotlarni to'playdi. Biroq ushbu ma'lumotlar turli formatlarda va tarqoq manbalarda saqlangani sababli, tahlilchilar ularni birlashtirish uchun oylalab vaqt sarflashga majbur bo'layotgan edi. Ushbu muammoni hal qilish maqsadida BMT Google hamkorligida va Google.org ko'magida «UN System Data Commons» ochiq platformasini taqdim etdi.

Yangi platforma Google Data Commons texnologiyasiga asoslangan bo'lib, xalqaro statistik ko'rsatkichlar, vaqt shkalalari va geografik chegaralarni yagona bilimlar grafigiga (knowledge graph) birlashtiradi. Tizim tabiiy tilni qayta ishlash imkoniyatlaridan foydalangan holda qidiruvni osonlashtiradi: foydalanuvchilar murakkab jadvallarni formatlash o'rniga oddiy tilda savol berib, aniq ma'lumotlar va vizualizatsiyalarni bir zumda olishlari mumkin.

Shu bilan birga, platforma tadqiqot jarayonlarida AI yordamchilardan foydalanishni yangi bosqichga olib chiqadi. Ochiq Model Context Protocol (MCP) standarti asosida ishlovchi tizim sun'iy intellekt agentlariga BMTning rasmiy bazasidan ma'lumotlarni avtonom tarzda yuklab olish, ko'rsatkichlarni o'zaro bog'lash hamda tayyor hisobotlar, infografika va grafiklar yaratish imkonini beradi.

BMT ma'lumotlariga ko'ra, loyiha doirasida yangi manbalar doimiy ravishda qo'shib boriladi va 2027-yilga kelib BMT tizimidagi barcha statistik ma'lumotlar bazalarining kamida 80 foizi ushbu platformaga integratsiya qilinadi. Barcha ma'lumotlar BMT mutaxassislari tomonidan tekshirilgan rasmiy manbalarga tayanadi.