Google yangi Gemini 4 Argon modelini chiqardi: dasturchilar yaratgan 5 ta loyiha

Google murakkab amaliy vazifalar ustida chuqur ishlashga mo'ljallangan yangi Gemini 4 Argon flagman modelini ommaga taqdim etdi. Mazkur model dasturlash, moliya, huquq, kiberxavfsizlik va fan sohalaridagi ko'p bosqichli murakkab topshiriqlarni yuqori aniqlikda bajarish qobiliyatiga ega bo'lib, bir qator benchmarklarda boshqa flagman modellardan ustun natija ko'rsatmoqda.

Argon fazoviy fikrlash, matematik aniqlik va vizual kodlashdagi yaxshilanishlar evaziga murakkab 3D muhitlarni yarata oladi. Lumina tomonidan o'tkazilgan sinovda model realistik yoritish, aks etish va suv harakatini o'z ichiga olgan gidrosamolyotning 3D simulyatsiyasini muvaffaqiyatli render qildi hamda bir nechta elementlar harakatini bir vaqtning o'zida muvofiqlashtirdi.

Shuningdek, Alex Patrascu NASA'ning yong'inlar bo'yicha ma'lumotlari hamda AQSh Geologiya xizmatining seysmik ko'rsatkichlarini Antigravity platformasida birlashtirib, real vaqtda ishlovchi interaktiv 3D globus ishlab chiqdi. Boshqa bir dasturchi Ashutosh Shrivastava esa Blender va Three.js yordamida reaktiv turbofan dvigatelining barcha qismlari va jonli o'lchovlariga ega batafsil simulyatsiyasini yaratishga erishdi.

Gemini 4 Argon oddiy 2D tasvirlarni interaktiv 3D tajribaga aylantirish qobiliyatiga ham ega. The Bugged Dev taqdim etgan bitta vagon tasviri orqali ishlovchi eshik-derazalari va miltillovchi chiroqlari bo'lgan 3D model hosil qilindi. Chong-U esa bir nechta o'yinchilar real vaqtda bayroqni egallash uchun raqobatlashadigan 'Backyard Rascals' nomli brauzer o'yinini ishlab chiqdi.

Gemini 4 Argon modeli hozirda dasturchilar va kompaniyalar uchun AI Studio hamda Gemini platformasi API orqali, shuningdek Google AI Ultra va pullik Pro obunachilari uchun Google Antigravity, Gemini ilovasi va Qidiruvdagi AI Mode tizimida global miqyosda foydalanishga topshirildi.