Meta kamersiz yangi Ray-Ban Meta Audio aqlli ko'zoynaklarini taqdim etdi

Meta o'zining Connect 2026 anjumanida audio imkoniyatlariga ixtisoslashgan va kamerasi bo'lmagan yangi Ray-Ban Meta Audio aqlli ko'zoynaklarini namoyish qildi. Mazkur qurilma kameraga ega aqlli ko'zoynaklar atrofida paydo bo'lgan maxfiylik muammolari va boshqalarni ularning roziligisiz yashirin suratga olish kabi salbiy holatlarga yechim sifatida ishlab chiqilgan.

EssilorLuxottica kompaniyasi bilan hamkorlikda tayyorlangan qurilma 349 dollardan boshlanuvchi narxda sotuvga chiqadi. Kameralar yo'qligi sababli ko'zoynak ancha yupqa va yengil bo'lib, uning vazni atigi 43 grammni tashkil etadi. Shuningdek, bir marta quvvatlash orqali 12 soatgacha, maxsus g'ilofi bilan esa 48 soatgacha ishlash imkoniyati mavjud.

Ray-Ban Meta Audio foydalanuvchilarga musiqa va podkastlar tinglash, qo'ng'iroqlarni amalga oshirish, suhbatlarni real vaqtda tarjima qilish hamda Meta'ning yangi Muse sun'iy intellekt assistenti bilan ovoz orqali muloqot qilish imkonini beradi. Yangi model «Clubmaster» va «Burbank» kabi retro va klassik uslublarda, jami 23 xil rang va linzalar kombinatsiyasida xaridorlarga taklif etiladi.

Ushbu taqdimot bilan bir qatorda, Meta kamerali ko'zoynaklarning navbatdagi avlodi — Ray-Ban Meta (Gen 3) modelini ham e'lon qildi. Ushbu model 12 megapikselli 3K Ultra HD video oluvchi kamera, 6 mikrofonli tizim va 9 soatgacha quvvat bilan ta'minlangan. Barcha yangi ko'zoynaklar Muse AI yordamchisi va ma'lumotlar xavfsizligini ta'minlovchi «maxfiy qayta ishlash» (private processing) tizimini qo'llab-quvvatlaydi.