OpenAI ChatGPT interfeysidagi Chat va Work bo'limlarini birlashtirmoqda

OpenAI kompaniyasi ChatGPT desktop ilovasidagi Chat va Work yorliqlarini yagona interfeysga birlashtirishga tayyorlanmoqda. Hozirda ilovada alohida ChatGPT hamda Codex bo'limlari, shuningdek, ChatGPT ichida mustaqil Chat va Work yorliqlari mavjud bo'lib, bu ayrim foydalanuvchilar uchun ish jarayonida noqulaylik tug'dirayotgan edi.

Foydalanuvchilarga yuborilgan xabarga ko'ra, yangilanish orqali foydalanuvchilar bir joyning o'zida fayllar va plaginlarni biriktirishi, g'oyalarni muhokama qilishi hamda ChatGPT orqali veb-sayt yaratish, taqdimot tayyorlash yoki internetda amallarni bajarishni buyurishi mumkin bo'ladi. Ushbu yangi imkoniyat avvaliga fikr-mulohazalar to'plash uchun tanlangan foydalanuvchilarga taqdim etiladi, keyinroq esa ommaviy ravishda ishga tushiriladi.

Shuningdek, OpenAI Codex funksiyasi desktop ilovada alohida tajriba sifatida saqlanib qolishini ma'lum qildi. Biroq yangi o'zgarishga binoan, ChatGPT va Codex endi umumiy token limitidan foydalanadi. Kompaniya bu aksariyat foydalanuvchilarga sezilmasligini, ammo faol foydalanish sharoitida ba'zi foydalanuvchilar limitlar tiklanishini ko'proq kutishlariga to'g'ri kelishi mumkinligini ta'kidladi.

Qayd etish joizki, sun'iy intellekt bozoridagi asosiy raqobatchilardan biri bo'lgan Anthropic kompaniyasi ham sentyabr oyida o'zining Claude xizmatidagi chat va Cowork funksiyalarini yagona ekranga birlashtirgan edi.