OpenAI ma'lumotlar markazlarini elektr tarmog'ini himoyalovchi stansiyalar sifatida taqdim etmoqda

OpenAI dushanba kuni Jorjiya shtatining Effingem okrugida qurilishi rejalashtirilgan yangi ma'lumotlar markazida "Grid Protectors Program" dasturini sinovdan o'tkazishini e'lon qildi. Kompaniyaning bildirishicha, ekstremal ob-havo yoki favqulodda vaziyatlar yuzaga kelganda, markaz 1 000 megavattgacha elektr energiyasini tarmoqqa qaytarib berishi mumkin. Bu taxminan 700 000 ta xonadondagi konditsionerlarni quvvat bilan ta'minlashga yetadigan energiya hajmidir.

Ushbu tashabbus AQSh bo'ylab ma'lumotlar markazlariga qarshi jamoatchilik noroziligi kuchaygan davrga to'g'ri kelmoqda. Mahalliy aholining fikri inobatga olinmasdan boshlangan yirik loyihalar turli shtatlarda qarshilikka uchramoqda. Masalan, Yuta shtatida 2025-yilda shtatning eng yuqori elektr talabidan ikki baravar ko'proq energiya iste'mol qilishi va vodiyga issiq havo chiqarishi kutilayotgan markaz tufayli aholi namoyishga chiqqan edi.

Shu sababli OpenAI o'z obyektlarini salbiy nomdan uzoqlashtirish maqsadida "hisoblash kampuslari" deb atamoqda va ularni mahalliy energetika tizimlariga yordam bera oladigan resurs sifatida ko'rsatishga urinmoqda. Kompaniya bayonotiga ko'ra, sun'iy intellekt infratuzilmasi yil davomida barqaror energiya talab qiladi, bu esa tarmoqning doimiy xarajatlarini taqsimlashga yordam beradi, moslashuvchanlik esa eng tig'iz paytlarda iste'molni kamaytirish imkonini yaratadi.

Ayni paytda Tennessi, Florida, Oklaxoma va Oregon kabi qator shtatlarda AI kompaniyalari energiya xarajatlarini oddiy aholi zimmasiga yuklashini taqiqlovchi qonunlar qabul qilingan. Bundan tashqari, Xyuston ilg'or tadqiqotlar markazi (HARC) hisobotiga ko'ra, Texasdagi yangi loyihalar havoni tozalash sohasida o'nlab yillar davomida erishilgan yutuqlarni bir necha yilda yo'qqa chiqarishi mumkin.

OpenAI kelajakda ham energetika xizmatlari va siyosatchilar bilan tarmoqqa tushadigan bosimni kamaytirish ustida ishlashini ma'lum qilgan. Jorjiya shtatidagi loyihadan tashqari, kompaniya Oracle va SoftBank bilan hamkorlikda Texas (Sheklford va Milam okruglari) hamda Nyu-Meksiko (Donya-Ana okrugi) shtatlarida "Stargate" ma'lumotlar markazlarini qurish ustida ish olib bormoqda.