Palantir daromadi rekord darajada o‘sdi, ammo korporativ sotuvlarda xavotirli belgilar bor

Palantir kompaniyasi uchinchi chorak bo‘yicha taassurotli moliyaviy hisobotini e'lon qildi. Kompaniyaning umumiy choraklik daromadi o‘tgan yilning mos davriga nisbatan 96 foizga o‘sib, birinchi marta 2 milliardlik dovonni zabt etdi va 2,31 milliard dollarni tashkil qildi. Bu tahlilchilar kutgan 2,18 milliard dollardan ancha yuqori bo‘lib, sof foyda ko‘rsatkichi ham kutilgandan oshdi.

Kompaniya tarixida birinchi marta AQShdagi tijorat sektoridan olingan daromad davlat shartnomalari tushumidan ustun keldi: tijorat shartnomalari 148 foiz o‘sish bilan 984 million dollarni, davlat buyurtmalari esa 953 million dollarni tashkil etdi. Korporativ mijozlar Palantir platformasidan o‘z ma'lumotlari va biznes jarayonlarini tashqi laboratoriyalarga bermasdan, ilg‘or va ochiq vaznli modellarni xavfsiz o‘qitish va ishlatish uchun foydalanmoqda.

Biroq ushbu yorqin raqamlar ortida investorlarni xavotirga solgan omillar ham aniqlandi. Palantir'ning AQSh korporativ sektoridagi umumiy shartnoma qiymati (TCV) o‘tgan chorakdagi rekord 2,13 milliard dollardan 1,46 milliard dollargacha qisqardi. Bu esa yangi yirik bitimlar tuzish sur'ati biroz sekinlashganidan dalolat beradi.

Kompaniya bosh direktori Aleks Karpning ta'kidlashicha, korxonalar AI dasturlarini tez sinovdan o‘tkazishga tayyor bo‘lsa-da, qisqa muddatli shartnomalar tuzishni afzal ko‘rmoqda. Bu holat korporativ AI bozoridagi yangi tendensiyani — kompaniyalar yangi texnologiyalarni byurokratiyasiz sinab ko‘rib, kutilgan natija bo‘lmasa, bitimlarni tezda bekor qilishga tayyor ekanini ko‘rsatadi.

Shunga qaramay, Palantir rahbariyati yil yakunlari bo‘yicha prognozlarini oshirdi va AQSh tijorat sektoridagi tushum 3,559 milliard dollardan oshishini kutmoqda. Bozorning uzoq muddatli barqarorligi esa to‘rtinchi chorakdagi yirik korporativ xaridlar natijasiga bog‘liq bo‘lib qolmoqda.