Starbucks avtomobilda xizmat ko'rsatish nuqtalarida AI asosidagi shaxsiylashtirilgan menyuni joriy qilmoqchi

Starbucks qahvaxonalar tarmog'i avtomobilda xizmat ko'rsatish (drive-thru) yo'laklarida sun'iy intellekt texnologiyalaridan foydalanishni kengaytirmoqda. Kompaniyaning moliyaviy hisobot yig'ilishida bosh direktor Brayan Nikkol ma'lum qilishicha, tarmoq mijoz kelgan zahoti uni taniydigan, shaxsiy raqamli menyuni ko'rsatadigan va to'lov jarayonini osonlashtiradigan yechimlarni sinab ko'rish niyatida.

Ushbu yondashuv boshqa tezkor ovqatlanish tarmoqlarining AI tashabbuslariga o'xshab ketadi. Masalan, Taco Bell har bir avtomobilga mos ravishda raqamli menyu dizayni va kontentini o'zgartirishni sinayotgan bo'lsa, McDonald's doimiy mijozlarni tanib, ularning odatiy buyurtmalarini taklif qiluvchi «ArchIQ» chatbotini sinovdan o'tkazmoqda.

Starbucks rejasiga ko'ra, 2027-yildan e'tiboran drive-thru nuqtalarida baristalarga yordam beruvchi fon AI modellari sinovdan o'tadi. Ushbu modellar buyurtmalarni yanada aniq va tezkor kiritish imkonini berishi kutilmoqda. Shuningdek, AI qidiruv va tavsiyalar tizimini yaxshilash uchun kompaniyaning mobil ilovasiga ham integratsiya qilinadi.

Kompaniya allaqachon bir qator sun'iy intellekt loyihalarini amaliyotga tatbiq etgan. Xususan, mijozlar ChatGPT orqali buyurtma berish imkoniyatiga ega bo'ldi, xodimlar uchun esa retseptlar va xizmat ko'rsatish standartlari bo'yicha savollarga javob beruvchi «Green Dot Assist» AI yordamchisi ishga tushirildi. Hozircha shaxsiy menyu doskalari qachon to'liq ommalashishi noma'lum bo'lib, kompaniya tizimni bosqichma-bosqich sinovdan o'tkazishini bildirgan.