Sun'iy intellekt xavfi Rockstar'ni GTA VI'ning PC talqinini tezroq chiqarishga majbur qilishi mumkin

Rockstar Games kompaniyasining sobiq texnik direktori Obbe Vermeij Rock Paper Shotgun nashriga bergan intervyusida sun'iy intellekt vositalarining rivojlanishi Grand Theft Auto VI loyihasining chiqarilish rejasiga ta'sir qilishi mumkinligini ma'lum qildi. Uning ta'kidlashicha, SI orqali dekompilyatsiya qilish imkoniyatlari kompaniyani PC versiyasini rejadagidan ertaroq chiqarishga undashi mumkin.

Tarixan Rockstar o'zining yirik loyihalarini avval konsollar uchun taqdim etib, kompyuterlar uchun mo'ljallangan talqinini oylar yoki hatto yillar o'tib chiqarish an'anasiga ega. PlayStation versiyalarining yuqori savdo ko'rsatkichlari sababli shakllangan ushbu yondashuv uzoq vaqtdan beri saqlanib kelmoqda. Biroq konsol binar kodlarini minimal inson aralashuvi bilan tezda xom kodga aylantira oladigan sun'iy intellekt vositalari bu hisob-kitoblarni o'zgartirishi mumkin.

Vermeij agar Rockstar rahbariyatida bo'lganida, kimdir PS5 talqinini SI yordamida kompyuterga moslab olishidan xavotirga tushgan bo'lishini bildirdi. GTA VI kabi murakkab ob-havo tizimlari va ilg'or grafika simulyatsiyalariga ega loyihani dekompilyatsiya qilish oson bo'lmasa-da, SI modellari yordamida buni amalga oshirish imkonsiz emas.

Sobiq mutaxassisning baholashicha, konsol talqinini bunday yo'l bilan qayta ishlash o'n minglab dollar miqdoridagi token xarajatini talab qiladi va rasmiy reliz darajasida sifatli bo'lmaydi. Shunga qaramay, ushbu natija ko'plab geymerlarni qanoatlantirishi mumkinligi sababli, Rockstar relizlar orasidagi farqni qisqartirishga majbur bo'lishi ehtimoldan xoli emas. Hozircha rasmiy e'lon berilmagan bo'lsa-da, manbalar GTA VI'ning PC versiyasi 2027-yilning birinchi choragida chiqishini taxmin qilmoqda.