YouTube yangi AI vositalari, moslashtirilgan tasmalar va jonli tarjimani e'lon qildi

Google o'tkazgan yillik "Made on YouTube" anjumanida yaqin oylarda striming platformasiga qo'shiladigan yangi funksiyalar taqdim etildi. Platforma ham tomoshabinlar, ham kontent yaratuvchilar uchun qator sun'iy intellekt imkoniyatlarini joriy etish bilan birga, interfeys va o'zaro muloqot vositalarini ham yangilamoqda.

Tomoshabinlar uchun eng sezilarli o'zgarishlardan biri — moslashtirilgan tasmalar (Custom Feeds) bo'ladi. Foydalanuvchilar qisqa matnli tavsif yozish orqali alohida mavzuli varaqalar yaratishi va ularni o'z xohishiga ko'ra sozlashi mumkin bo'ladi. Shuningdek, izohlarda GIF-tasvirlardan foydalanish va guruhli yozishmalar imkoniyati yo'lga qo'yilmoqda. Mahsulotlar sharhini tomosha qilishda esa "Ask YouTube" AI yordamchisi matn yoki ovoz orqali tovar haqida qo'shimcha ma'lumot beradi va taqqoslash jadvallarini tuzadi.

YouTube Music ilovasida "Ask Music" funksiyasi yanada qulayroq joylashtirilib, u orqali AI yordamida pleylistlar yaratish yoki ijrochilar haqida ma'lumot olish osonlashadi. Shu bilan birga, obunachilar uchun tavsiya etilgan podkastlarning haftalik audio sharhini taqdim etuvchi "Your Podcast Lineup" sun'iy intellekt vositasi ishga tushiriladi.

Mualliflar uchun taqdim etilgan vositalar qatorida Gemini modeliga asoslangan suhbatli montaj funksiyasi alohida o'rin tutadi. "YouTube Create" ilovasida videolarni AI orqali tahrirlash hamda tomoshabinlar e'tiborini eng ko'p tortadigan variantni aniqlash uchun birdaniga uch xil versiyani A/B testdan o'tkazish imkoni yaratiladi. Yangi "Ask Studio" yordamchisi esa kadrlash, videoning sur'ati bo'yicha maslahatlar beradi va AI yordamida eskizlar (thumbnails) yasaydi.

Jonli efir yo'nalishida esa platforma real vaqtda avtomatik tarjima qilish (autodubbing) tizimini e'lon qildi. Google'ning takomillashtirilgan Gemini tarjima modeliga tayangan ushbu texnologiya tufayli xorijiy tomoshabinlar boshqa tildagi jonli efirlarni o'z ona tillarida to'g'ridan-to'g'ri tinglashlari mumkin bo'ladi. Shuningdek, strimerlar o'rtasida o'zaro musobaqa uyushtirishga mo'ljallangan yangi interaktiv formatlar ham sinovdan o'tkazilmoqda.