Anthropic biolaboratoriyasi Claude yordamida Crispr'ga o'xshash yangi ferment tizimini kashf etdi

Anthropic kompaniyasi o'zining sun'iy intellekt modeli Claude DNK ketma-ketliklari bazasini o'rganish orqali yangi ferment tizimini mustaqil ravishda topganini ma'lum qildi. Kompaniya ushbu mexanizmni mashhur gen tahrirlash vositasi bo'lgan Crispr texnologiyasiga qiyoslamoqda. Bu natija Anthropic'ning yaqinda ishga tushirilgan biologik laboratoriyasi (wet lab) uchun ilk yirik ilmiy yutuq bo'ldi.

Kashfiyot jarayonida qariyb 950 ta Claude agenti 21 soat davomida birgalikda ishlab, 210 million tokendan iborat ma'lumotlarni tahlil qildi. Agentlardan biri DNK ma'lumotlar to'plamida g'ayrioddiy takrorlanuvchi qonuniyatni payqab, insonlar tekshirishi uchun belgilab qo'ygan. Keyingi laboratoriya tahlillari bakteriyalarni zararlaydigan bakteriofaglarda ilgari fanga noma'lum bo'lgan ferment tizimi mavjudligini tasdiqladi.

Anthropic olimlarining roli faqat dastlabki promptni shakllantirish va laboratoriyada tahlil o'tkazish bilan chegaralanganini ta'kidladi. Hozirda mutaxassislar ushbu ferment tizimining aniq vazifasini o'rganishda davom etmoqda. Kompaniya kashfiyotni erta bosqichda e'lon qilishdan maqsad Claude'ning ilmiy imkoniyatlarini ko'rsatish ekanini bildirdi.

Crispr bilan taqqoslashlarga qaramay, mazkur kashfiyotning amaliyotda, xususan, tibbiyotda qanchalik inqilobiy bo'lishi hali noma'lum. Anthropic ommaviy kompaniyaga aylanishga tayyorgarlik ko'rayotgan bir paytda o'z laboratoriyasiga ko'proq olimlarni jalb qilish va dori vositalarini yaratish sohasiga kirib borishni rejalashtirmoqda.