Claude bank hisoblarini tahlil qiluvchi yangi Personal Finance vositasini taqdim etdi

Anthropic kompaniyasi Claude platformasiga shaxsiy mablag'larni kuzatish va tahlil qilishga yordam beradigan yangi "Personal Finance" vositasini qo'shdi. Yangi imkoniyat orqali foydalanuvchilar Plaid integratsiyasi yordamida o'zlarining bank hisoblari hamda kredit kartalarini chatboti bilan bog'lashlari mumkin. Kompaniya ma'lumotlariga ko'ra, ulanish faqat "o'qish uchun" (read-only) rejimida ishlaydi, ya'ni tizim pullarni boshqarish, o'tkazish yoki investitsiya qilish vakolatiga ega emas.

Ushbu integratsiya Claude chatbotini oddiy umumiy maslahatlar beruvchi vositadan to'liq moliyaviy yordamchiga aylantiradi. Foydalanuvchilar oylik xarajatlarining qayerga sarflanganini so'rashlari, Claude esa ularni ijara, oziq-ovqat yoki xaridlar kabi aniq toifalarga ajratib, o'tgan davrlar bilan taqqoslab berishi mumkin.

Yangi vosita oddiy xarajatlar hisobotidan tashqari, takroriy yechib olingan to'lovlar, kutilmagan yig'imlar va muntazam oshib borayotgan to'lovlar kabi moliyaviy muammolarni ham aniqlaydi. Shuningdek, u foydalanuvchining daromadidan ortiq xarajat qilayotganini tahlil qilishi hamda yillik foiz stavkasi (APR) kabi murakkab tushunchalarni oddiy tilda tushuntirib berishi mumkin.

Maxfiylik va xavfsizlikni ta'minlash maqsadida Claude faqat bank nomi, hisob turi, hisob raqamining oxirgi to'rtta raqami, balanslar va ikki yillik tranzaksiyalar tarixini ko'ra oladi. Anthropic ta'kidlashicha, ushbu bo'limdagi suhbatlar sun'iy intellekt modellarini qayta o'qitish uchun ishlatilmaydi, shuningdek, xizmat ichida hech qanday reklama yoki homiylik takliflari berilmaydi.

Ushbu funksiya OpenAI tomonidan may oyida taqdim etilgan shunga o'xshash shaxsiy moliya imkoniyatlariga munosib javob bo'ldi. Ayni paytda Personal Finance vositasi AQShdagi Pro, Max va Ultra tariflariga ega foydalanuvchilar uchun beta-bosqichda bosqichma-bosqich taqdim etilmoqda.