AQShda AI yordamida millionlab dollar talaba kreditlarini o‘g‘irlagan «arvoh talabalar» fosh etildi

AQSh Adliya vazirligi (DOJ) Federal qidiruv byurosi (FQB) va Ta'lim vazirligi bilan hamkorlikda «arvoh talabalar» (ghost students) deb nomlangan yirik firibgarlik sxemasini fosh qildi. Jinoyatchilar AQSh fuqarolarining shaxsiy ma'lumotlarini o‘g‘irlab, ularning nomidan kollej va universitetlarga o‘qishga kirgan hamda talabalar uchun ajratiladigan federal kredit mablag‘larini o‘zlashtirgan. Mazkur ish doirasida besh nafar shaxsga rasman ayblov qo‘yildi.

Tergov ma'lumotlariga ko‘ra, firibgarlar asosan kollejga bormay to‘g‘ridan-to‘g‘ri ishga kirgan maktab bitiruvchilarining shaxsiy ma'lumotlarini sotib olgan. Ular ushbu ma'lumotlar orqali FAFSA (Federal talabalar yordami) arizalarini to‘ldirgan. O‘qish to‘lovlaridan ortib qolgan yordam pullari firibgarlar va ularning vositachilari nazoratidagi bank hisoblariga tushirilgan.

Mablag‘lar oqimini uzluksiz ushlab turish uchun jinoyatchilar sun'iy intellektdan keng foydalangan. AI vositalari nafaqat arizalarni to‘ldirish va o‘quv topshiriqlarini bajarish, balki virtual darslarda go‘yoki haqiqiy talaba qatnashayotgandek ko‘rinish yaratish uchun qo‘llanilgan. Bu esa soxta talabalarga bir necha semestr davomida o‘qishni «davom ettirish» imkonini bergan.

Rasmiylarning bildirishicha, hozirgacha 830 mingdan ortiq shubhali federal talaba hisobi aniqlangan. Agar ularning barchasi soxta ekani tasdiqlansa, umumiy yo‘qotishlar 130 million dollarga yaqinlashishi mumkin. Hozirgi kunda tergov doirasida 32 million dollardan ortiq haqiqiy zarar aniqlangan va Keniyadagi tarmoqqa tegishli 750 ming dollardan ortiq kriptovalyuta musodara qilingan.

Hukumat ushbu holatlarning oldini olish maqsadida real vaqtda hujjatlarni tekshiruvchi avtomatlashtirilgan tizimlarni joriy qilmoqda. Biroq ta'lim sohasi mutaxassislari bu yangi tekshiruvlar rasmiy ID hujjatlarga ega bo‘lmagan kam ta'minlangan haqiqiy talabalarning moliyaviy yordam olish jarayonini qiyinlashtirishi yoki kechiktirishi mumkinligidan xavotir bildirmoqda.