Google sun'iy intellektning iqtisodiyotga ta'sirini o'rganish bo'yicha tadqiqot jamoasini kengaytirmoqda

Google sun'iy intellektning global iqtisodiyot, ish o'rinlari va umumiy mahsuldorlikka ko'rsatayotgan ta'sirini chuqur ilmiy asosda o'rganish maqsadida o'zining AI & Economy Research Program tashabbusini kengaytirmoqda. Ushbu loyiha texnologik transformatsiyaning mehnat bozoriga real ta'sirini tizimli ravishda tahlil qilishga xizmat qiladi.

Tadqiqot guruhiga jahon miqyosidagi yetakchi iqtisodchilar, jumladan, Nobel mukofoti laureati Filipp Agiyon (Philippe Aghion) hamda professor Ajay Agraval (Ajay Agrawal) akademik maslahatchi va taklif etilgan ilmiy xodim sifatida qo'shildi. Dastur faoliyatiga esa yangi direktorlar — Anu Madgavkar va Deniel Rok (Daniel Rock) rahbarlik qiladi. Ular Google DeepMind vakili Aleks Imas hamda Bosh iqtisodchi ofisi mas'uli Zanna Ishenko bilan hamkorlikda faoliyat yuritadi.

Ushbu loyiha avvalroq taqdim etilgan AI & Economy ATLAS v1.0 ochiq ma'lumotlar platformasi natijalariga tayanadi. Tadqiqot dasturi doirasida sun'iy intellekt vositalarining biznes jarayonlariga integratsiyalashuv sur'ati, mutaxassisliklarga bo'lgan talabning o'zgarishi va texnologiyalarning ilmiy kashfiyotlar rivojiga ko'rsatayotgan ta'siri tahlil qilib boriladi.

Kompaniya taqdim etayotgan tahlillar xususiy sektor, tadqiqotchilar va davlat siyosatini ishlab chiquvchilarga xodimlarning malakasini oshirish hamda sun'iy intellekt davrida iqtisodiy barqarorlikni ta'minlashga qaratilgan amaliy dasturlarni ishlab chiqishda ko'maklashadi.