Nvidia bosh direktori Jensen Huang xiyonatni tan oldi: voqea ortida josuslik gumoni bor

Nvidia bosh direktori Jensen Huang o'z xodimlariga yo'llagan ichki xatida nikohiga xiyonat qilganini tan oldi va oilasi hamda jamoasidan uzr so'radi. Ushbu bayonot Financial Times nashri Huangning AQSh razvedkasi tomonidan Xitoy maxsus xizmatlariga aloqadorlikda gumon qilinayotgan ayol bilan munosabatlari haqida xabar berganidan ikki kun o'tib e'lon qilindi.

AQSh razvedka ma'lumotlariga ko'ra, Huang Singapurdagi Megaspeed kompaniyasi top-menejeri Alis Huang bilan aloqada bo'lgan. Megaspeed Nvidia mijozlaridan biri hisoblanadi va AQSh hukumati uni Xitoyga zamonaviy chiplarni noqonuniy yetkazib berishda gumon qilib tekshirayotgan edi.

Voqea fonida Nvidia direktorlar kengashi xorijiy razvedka urinishlari va xavfsizlik masalalarini o'rganish uchun tashqi yuristlar ishtirokida mustaqil tekshiruv boshladi. Kompaniya milliy xavfsizlik va intellektual mulk sirlari xavf ostida qolganiga hozircha asos yo'qligini, biroq barcha ma'lumotlar chuqur o'rganilishini ta'kidladi.

Ushbu mojaro sun'iy intellekt bozoridagi yetakchi kompaniya uchun jiddiy zarba bo'ldi va kompaniya aksiyalari Frankfurt birjasida 6 foizdan ortiq pasaydi. Shu bilan birga, AQSh Kongressining Xitoy bo'yicha qo'mitasi rahbari Jon Mulenar Huangni parlament oldida tushuntirish berishga chaqirdi.

AQSh prezidenti Donald Tramp Jensen Huangni qo'llab-quvvatlab, uning mamlakat uchun ajoyib ish qilganini aytdi, shuningdek, Ilon Mask ham Huangni ushbu avlodning eng buyuk tadbirkorlaridan biri deb atab, uning AI yetakchiligidagi o'rnini himoya qildi.