OpenAI 1,25 trillion dollar baholash bilan 11 milliard dollar investitsiya jalb qildi

Bloomberg axborot agentligi manbalariga tayanib berilgan xabarga ko‘ra, OpenAI yangi investitsiya bosqichida 11 milliard dollar mablag‘ to‘plagan bo‘lib, unda sun'iy intellekt laboratoriyasining umumiy qiymati 1,25 trillion dollarga baholangan. Bu mablag‘ hali to‘liq yakunlanmagan yirikroq investitsiya raundining bir qismi bo‘lib, kelgusi haftalarda uning umumiy hajmi taxminan 20 milliard dollarga yetishi mumkin.

Sentyabr oyi oxirida OpenAI mazkur bosqichda 30 milliard dollar jalb qilmoqchi ekani haqida xabarlar tarqalgan edi, biroq hozirgi ko‘rsatkichlar dastlabki maqsadga nisbatan ancha kamroq. Kompaniya joriy yilda o‘z aksiyalarini birjada ochiq sotishga (IPO) chiqarish niyatini bildirgan bo‘lsa-da, keyinchalik bu rejalarni kechiktirdi. Hozirda OpenAI kelgusi yilda birjaga chiqishi kutilmoqda.

Ushbu moliyaviy yangiliklar OpenAI’ning asosiy raqobatchisi Anthropic atrofidagi voqealar fonida yuz bermoqda. Bloomberg ma’lumotiga ko‘ra, Anthropic aksiyalarining ehtimoliy xaridorlari kompaniyani ilgari kutilgan 2 trillion dollar o‘rniga taxminan 1,1 trillion dollar atrofida baholamoqda.

Umuman olganda, sun'iy intellekt bozori hozirda noaniq va qaltis vaziyatda turibdi. AQSH oraliq saylovlaridagi o‘zgarishlar hamda ma'lumotlar markazlari qurilishiga nisbatan saylovchilarning salbiy munosabati bozor ishtirokchilarida xavotir uyg‘otmoqda va kelgusida tartibga solish bo‘yicha yangi qiyinchiliklar tug‘dirishi kutilmoqda.