Physicl robotlarni simulyatsiyada o‘qitish uchun 10 million dollar investitsiya jalb qildi

Robototexnika va sun'iy intellekt sohasida faoliyat yurituvchi Physicl startapi Inovia Capital venchur fondi boshchiligidagi dastlabki (seed) investitsiya bosqichida 10 million dollar jalb qildi. Kompaniya robotlarni jismoniy dunyoga tayyorlash uchun zarur bo‘lgan realistik simulyatsiyalar va sintetik ma’lumotlar platformasini yaratish bilan shug‘ullanadi.

Kompaniya asoschisi va bosh ijrochi direktori Aleks de Vigan avval elektron tijorat mahsulotlarini 3D formatda renderlash bilan shug‘ullanuvchi nfinite kompaniyasini boshqargan. Generativ AI ommalashgach, de Vigan ushbu texnologik bazani robotlarning fazoviy tushunchasini va ob'yektlar bilan o‘zaro ta’sirini rivojlantirishga yo‘naltirishga qaror qildi.

Bugungi kunda jismoniy sun'iy intellekt modellarini video yoki masofaviy boshqaruv orqali o‘qitish katta xarajat va qiyinchiliklar tug‘dirmoqda. Raqamli simulyatsiyalar arzonroq yechim hisoblansa-da, ularning real fizika qoidalariga aniq mos kelmasligi asosiy to‘siq bo‘lib qolayotgan edi. Physicl esa nostandart ma'lumotlarni geometriya, materiallar va fizikasi to‘g‘ri bo‘lgan yuqori sifatli 3D muhitlarga aylantirishni taklif etmoqda.

Startap Studio nomli mahsulotini taqdim etgan bo‘lib, unda 10 000 ta 3D muhit va 100 000 ta turli xil ob'yektlar aktivi mavjud. Bu tizim robotlarni murakkab sharoitlarda, masalan, yorug‘lik yetarli bo‘lmagan yoki buyumlar tartibsiz sochilgan stollarda to‘g‘ri ishlashga o‘rgatuvchi sintetik ma'lumotlarni generatsiya qilishga imkon beradi.

Physicl platformasining ilk hamkorlaridan biri Myunxen texnika universiteti professori Mattias Nisner asos solgan SpAItial kompaniyasi bo‘ldi. Nisnerning ta'kidlashicha, yangi yechim ma'lumotlarni qo‘lda to‘plash va tozalash kabi uzoq jarayonlarni avtomatlashtirib, model ehtiyojiga qarab onlayn tarzda sintetik ma'lumot hosil qilish imkonini beradi.