Uoll-strit gigantlari AI bozoridagi qarz xatarlaridan ogohlantirmoqda

Gonkongda o'tkazilgan global moliyaviy yetakchilar sammitida Uoll-strit rahbarlari sun'iy intellekt pufagi va uning xatarlari borasida ikki xil fikrga bo'lingani ma'lum bo'ldi. Jahonning eng yirik obligatsiya fondlaridan biri bo'lgan PIMCO rahbari Emmanuel Roman AI bozorida kutilayotgan pasayish davri boshlanishi va tizimda jiddiy moliyaviy uzilishlar yuz berishi mumkinligini ta'kidladi.

Moliyaviy tahlilchilarning baholashicha, sun'iy intellekt infratuzilmasini kengaytirish kelgusi besh yil ichida 2 trillion dollargacha qarz mablag'larini jalb qilishni talab etadi. AQSHning umumiy obligatsiyalar bozori taxminan 12 trillion dollarni tashkil etishini hisobga olsak, bu ko'rsatkich moliyaviy tizim uchun ulkan yukni anglatadi. Ilgari AI sektoriga faol sarmoya kiritgan PIMCO kabi kompaniyalar ayni paytda o'zlarining ba'zi AI qarz aktivlarini sotishga kirishgan.

Apollo Global Management prezidenti Jim Zelter ham hisoblash quvvatlariga talab oshib borishini e'tirof etgan holda, narxlar shakllanishi va iqtisodiy modelning noaniqligini asosiy xavf sifatida qayd etdi. Shunga qaramay, yirik kompaniyalarning qarz olish sur'ati to'xtagani yo'q: Meta 15–20 milliard dollarlik obligatsiyalariga 58 milliard dollarlik talab oldi, Oracle 20 milliard dollar, Alphabet 6,7 milliard dollar atrofida va Microsoft 25 milliard dollarlik obligatsiyalar chiqardi.

Investorlar bozorning qachon va qanday o'zgarishini aniq aytolmasalar-da, AQSH foiz stavkalarining o'zgarishi yoki global iqtisodiy tebranishlar kabi makroiqtisodiy omillar AI sarmoyalari oqimiga salbiy ta'sir ko'rsatishi mumkinligidan ogohlantirmoqda.