YouTube kontent mualliflari uchun Studio ilovasida yangi sun'iy intellekt funksiyalarini taqdim etdi

YouTube har yili o'tkaziladigan Made On YouTube anjumanida kontent yaratuvchilarga kanallarini rivojlantirish va videolarni chuqur tahlil qilishda ko'maklashuvchi yangi sun'iy intellekt vositalari to'plamini taqdim etdi. Asosiy yangiliklardan biri — AI yordamida ishlovchi Ask Studio savol-javob funksiyasining iOS va Android mobil ilovalariga kengaytirilishidir.

Studio ilovasida taqdim etilgan qoralamalarni tahlil qilish funksiyasi e'lon qilinmagan videolarni sun'iy intellekt yordamida o'rganib chiqadi. Tizim videoning sur'ati, tuzilishi va hikoya qilinishi bo'yicha amaliy maslahatlar beradi. Bundan tashqari, platformada nimalar ommalashayotganini ko'rsatuvchi yangi tadqiqot tasmasi (research feed) joriy etilmoqda.

Mualliflar uchun video muqovasi (thumbnail) va sarlavhalarini yaratish jarayoni ham soddalashtirildi. Endi AI video mazmuni va muallifning uslubiga mos muqovalar taklif qiladi. Yangi dinamik muqovalar vositasi orqali bitta videoga uchtagacha variant yaratib, ularni auditoriyaning turli toifalariga alohida ko'rsatish mumkin.

Kompaniya ma'lumotlariga ko'ra, hozirgacha A/B test funksiyasidan foydalanib 40 milliondan ortiq sinov o'tkazilgan. Tez orada mualliflar qaysi kirish qismi (hook) yaxshiroq ishlashini aniqlash uchun bitta videoning uch xil qirqimini ham sinab ko'rishlari mumkin bo'ladi. Shuningdek, Studio ilovasi yil oxirigacha sust ishlayotgan muqovalarni avtomatik tarzda almashtirish funksiyasiga ega bo'ladi.