Google DeepMind va Singapur hukumati firibgarlikni aniqlovchi yangi AI modelini yaratdi

Singapurda soxta ish o'rinlari, soxta investitsiyalar va davlat xodimlari nomidan amalga oshiriladigan firibgarliklar umumiy jinoyatlarning yarmidan ko'pini tashkil etmoqda. 2019-yildan buyon bu kabi jinoyatlar oqibatida yetkazilgan zarar 4 milliard Singapur dollaridan oshib ketdi. Hujumchilar oddiy fishing usullaridan ko'ra murakkab ijtimoiy muhandislikka o'tgani sababli an'anaviy xavfsizlik tizimlari har doim ham ularni aniqlay olmayapti.

Ushbu muammoga qarshi kurashish uchun Google DeepMind va Singapur hukumati milliy AI hamkorligi doirasida Google'ning yengil Gemma modelini nozik sozlashdan (fine-tuning) o'tkazdi. Model mahalliy muassasalar, banklar va taniqli shaxslar nomidan qilinadigan soxta yozishmalar bazasida o'qitilgan bo'lib, oddiy muloqotni real manipulyatsiyadan oson ajrata oladi.

Xabarlarni bulutli serverlarda tekshiradigan an'anaviy vositalardan farqli o'laroq, mazkur AI to'liq foydalanuvchi qurilmasida (on-device) ishlaydi. Ilovalarga integratsiya qilingan tizim foydalanuvchining roziligi bilangina ishga tushadi va chatlardagi yozishmalarga na Google, na Singapur hukumati kira olmaydi.

Foydalanuvchi qurilmasida manipulyatsion xatti-harakatlar aniqlangan zahoti, model zudlik bilan ekranda ogohlantirish chiqarib, moliyaviy mablag' yoki shaxsiy ma'lumotlarni yuborishdan oldin ehtiyot bo'lishni maslahat beradi. Loyiha shaxsiy daxlsizlikni buzmasdan kiberjinoyatchilikka qarshi kurashishning namunaviy modeli sifatida taqdim etildi.